ദോഹ: വിനോദസഞ്ചാര മേഖലയിൽ ഖത്തർ സൃഷ്ടിക്കുന്നത് വൻ കുതിപ്പ്.
ഈ വർഷം ആദ്യ നാല് മാസങ്ങളിൽ രാജ്യത്ത് 2 ദശലക്ഷത്തിലധികം സന്ദർശകർ എത്തി. ഇത് 2023 ലെ ഇതേ കാലയളവിനെ അപേക്ഷിച്ച് 35% കൂടുതലാണ്. ഈ വർഷം പൂർത്തിയാകുമ്പോൾ കഴിഞ്ഞ വർഷം രാജ്യത്ത് എത്തിയ സഞ്ചാരികളേക്കാൾ അഞ്ചുലക്ഷം സഞ്ചാരികൾ കൂടുതൽ എത്തുമെന്നാണ് പ്രതീക്ഷിക്കുന്നത്.
45 ലക്ഷം ആളുകൾ ഖത്തർ സന്ദർശിക്കുമെന്നാണ് പ്രതീക്ഷിക്കുന്നത്. കഴിഞ്ഞ വർഷം രാജ്യത്ത് എത്തിയ സന്ദർശകരുടെ എണ്ണം 40 ലക്ഷമായിരുന്നു.
2023 ൽ, വിനോദസഞ്ചാര വരുമാനം 31% വർധിച്ച് 81.2 ബില്യൻ റിയാലിലെത്തി, ഇത് രാജ്യത്തിന്‍റെ മൊത്തം സമ്പദ്‌വ്യവസ്ഥയുടെ 10.3% ആണ്.
ഈ മികച്ച പ്രകടനം 2024 ൽ ആവർത്തിക്കുമെന്ന് പ്രതീക്ഷിക്കുന്നു. വേൾഡ് ട്രാവൽ ആൻഡ് ടൂറിസം കൗൺസിലിന്‍റെ 2024 ഇക്കണോമിക് ഇംപാക്റ്റ് റിസർച്ച് റിപ്പോർട്ട് അനുസരിച്ച്, ഖത്തർ ട്രാവൽ ആൻഡ് ടൂറിസം മേഖല ഖത്തർ സമ്പദ്‌വ്യവസ്ഥയ്ക്ക് 90.8 ബില്യൻ റിയാൽ സംഭാവന ചെയ്യും. ഇത് രാജ്യത്തിന്‍റെ മൊത്തം വരുമാനത്തിന്‍റെ 11.3% ആണ്.
പുതിയ നിരവധി പദ്ധതികൾ അതിവേഗ വളർച്ചക്കായി ഖത്തർ തയ്യാറാക്കുന്നുണ്ട്.
ലോകകപ്പ് ഫുട്ബോളിന് ആതിഥ്യം വഹിച്ചതാണ് ഖത്തറിൻ്റെ ടൂറിസം വളർച്ചയിലെ നാഴികക്കല്ല്. നിരവധി രാജ്യാന്തര എക്സിബിഷനുകൾ സംഘടിപ്പിക്കുന്നതും ഖത്തറിന് ഗുണം ചെയ്യുന്നു.
